“حلاوة الويك إند: رحلة إلى المسمط بعنوان “ما بلاش نتكلم في الماضي
أتمنى -عزيزي القارئ- أن يصلك مقالي هذا وانت سعيد وشبعان.
لأن الكلام اللي احنا داخلين عليه ده كلام كبير!
موضوع النهاردة سري للغاية، وشائك جدًا ولذيذ جدًا جدًا.
حنتكلم بكل الحب عن الأكلات العجيبة الغريبة اللي محدش في الكوكب كله بيأكلها إلا… بس في مصر!
-هذه الأكلات التي سيتم عرضها نحن غير مسؤولين عن ماضيها بل نهتم فقط بحاضرها وهي في الطبق كده-
١- الممبار. 
الممبار هو جاسوس مدسوس بيلعب على الوشين.
مرة يبقى نازل على السفرة منتميًا لعائلة المحاشي، ومرة ينزل كعضو من أعضاء أسرة اللحوم المشوية بأنواعها المختلفة.
بغضّ النظر عن انتمائات الممبار وعن ماضيه اللي إحنا مش مهتمين به إطلاقًا…
إلا إن الممبار هو من أعظم الأكلات بلا شك اللي أعدائها قليلين جدًا وصعب تلاقي إختلاف عليه…
محمّر ومقرمش من بره وطري ومحشي من جوَّه… ومع خالص إحترامنا لثقافات ومطابخ الآخرين،
إلا إن المطبخ المصري في الصدارة بسبب اختراع زي الممبار.
٢- الكوارع. 
إحنا عمرنا ما حنفهم إزاي الإنسان اللي اكتشف الكوارع إزاي مآخدش نوبل…
الإنسان المصري مش بس اخترع أكلة الكوارع،
لأ ده كمان أقنع مجموعة من الناس إنها أكلة مفيدة للمفاصل وعلاج لمشاكل الرُّكَب… أستاذ والله ورئيس قسم!
المصريين مش بس بيأكلوا الكوارع وبيحبوها…
دول بيتفننّوا في طبيخها وعملوا قائمة طويلة عريضة من الأصناف على شرفه…
كوارع مسلوقة ومحمرة/ فتة كوارع/ شوربة كوارع/ برام ورق عنب أو أي نوع محشي بالكوارع… إلخ.
٣- العكاوي. 
واضح إن الموضوع بيخرج من إيدينا وبنفقد السيطرة… إزاي وصلنا لكده؟
العكاوي -عزيزي القارئ- هي بدون مقدمات عبارة عن ديل الحيوان.
وده إن دلّ على حاجة فيدل على شدة حبنا للحيوان…
اللي هو إحنا بنحبه وحنأكله حتى آخر فتفوتة فيه… من رأسه لحد ديله.
ناس كتير أعرفهم -بكل عفوية- بيطلبوا العكاوي من المنيو بقالهم كتير وميعرفوش ماضيه الأليم.
يمكن الإغراء برده بصراحة بيبقى قوي جدًا… الطريقة الأشهر لهذه الأكلة المريبة هو “طاجن العكاوي”
بتجيلك وسط الخضروات والبصل فتقريبًا هذا المزيج العظيم بيصيبك بحالة فقدان ذاكرة مؤقت، يخليك تنسى ماضي الطاجن ده!!
،،
بصراحة شديدة أنا معنديش فكرة اللي اكتشف الأكلات دي كان بيفكر في إيه… أو كان عايز يوصل لإيه بالظبط.
لكن إحنا مديونين له بعمرنا وكرشنا… وحقيقي بنشكره من كل قلبنا.
اختيارات الأكل اللي احنا اتكلمنا عنها دي وغيرها كتير مش حتلاقيهم
ولا حتأكلهم في أي حتة في العالم غير بس في مصر، ومتحاولش تحكي لأصحابك الأجانب مثلًا عن الموضوع ده عشان مش حيفهموه.
ونصيحة أخوية كمان متحاولش تدوّر وإنت بتأكل عن تاريخ اللي إنت بتأكله،
مش لازم تعمل أبحاث ودراسات… استمتع بالحاضر وبلاش نتكلم في الماضي.